Håslåttfestivalen starta med ein idé om å setje Viksdalen på kartet. Ja, ikkje berre Viksdalen, men bygdene i ein større samanheng. Ei anna drivkraft låg hjå hyttefolk og utflytte viksdøler som i rein kjærleik ønskte å gje noko attende til bygda i form av sommarleg samlingspunkt. I nært samarbeid med det aktive nærmiljørådet i bygda og dugnadsvillege bygdefolk, såg Håslåttfestivalen dagslyset for første gong i 2022. Olsokhelga peika seg ut som eit aktuelt tidspunkt for det som blir kalla ein festival, men kanskje betre er skildra som ein sommarlett arena for gode debattar, kulturelle arrangement og rein bygdeglede.