SFE inviterer til omvising i Øksenelvane

Søndag 7. juni opnar vi opp for publikum i utbyggingsprosjektet vårt i Øksenelvane. Her får publikum ei unik moglegheit til å kome tett på ei av dei største kraftutbyggingane i Noreg i dag.

Utbygginga av Nye Øksenelvane kraftverk starta i august og det er Skanska som hovudentreprenør. Det nye kraftverket skal erstatte det over 70 år gamle kraftverket som er i drift i Øksenelvane i dag. Det nye kraftverket vil ha firedobla effekt og auke straumproduksjonen frå 150 til 171 GWh. Det tilsvarer omtrent årleg straumbruk til 9000 bustadar.

Tunnelen inn til kraftstasjonen er no ferdig, og arbeidet med tunnelen oppover mot inntaket i Øksendalsvatnet (Storevatnet, 400moh), pågår for fullt. Det blir gruppevis omvisning i dei ulike tunnelane og på riggområdet. Etterpå byr vi på svele og kaffi.

Praktisk informasjon:

• Påmelding: Alle som ønskjer å delta, må melde seg på (sjå lenger ned). Det er 35 plassar i kvar gruppe, og her er førstemann til mølla.
• Omvisinga varer frå kl. 12.00 til 15.00
• Parkering er ved Ålfoten skule. For å unngå stor trafikk på dei smale vegane inn til Øksenelvane, set vi opp buss frå Ålfoten skule. Første buss går kl. 11.30, og deretter går det skyttel fram og tilbake fram til kl. 15.00
• Det er om lag 400 meter å gå inn i tunnelane – gode sko og klede er derfor å tilrå
• Har du med barn, må du passe godt på. Alle skal vere i gruppa si heile tida, og ingen skal gå frå gruppa. Ein skal ikkje gå forbi sperra område.
• Det er ikkje tillate å ta bilete i tunnelane eller på området
• Påmeldingsfrist 4.juni

Vi byr på kaffi og svele i kantinebygget etter omvisninga.

Har du særlege omsyn, er det fint om du kontakter oss på e-post: post@sfe.no eller på telefon 57 88 47 00.