Er du singel, glad i festivalar og likar å gå i fjellet? Då finst det kanskje ikkje noko betre enn å finne kjærleiken – under Vinjerock!Me vil sjå flørt i fjellet og håpar det oppstår søt musikk når me lanserar den gode stemninga frå singelturane i skeiv versjon. Om du er han, ho, eller hen – alle er velkomne til å prøve å finne kjærleiken saman med oss.To turleiarar viser veg og sørger for god stemning, og me avsluttar det heile med å gå i PRIDE-paraden saman med resten av festivalgjengen. Me gjer sjølvsagt vårt beste for å sørge for variasjon i kjønnsbalansen!

Her slepp du å lure på om kjekkasen i teltet ved sida av er singel – og om de eigentleg har noko til felles. Finner du ikkje kjærleiken akkurat denne gongen, så har du i alle fall fått deg ein fin tur – og ei grøn eller regnbogefarga hue du kan bruke på neste fjelltur.

Gradering: grøn
Antal plassar: 30
Pris: Gratis med påmelding
Tidspunkt:

• Fredag 10:00–11:30 (Pride startar 11:30) 

Utstyr:

• Matpakke
• Stor vassflaske
• Gode sko
• Grøn eller regnbogefarga hue
• Glimt i auget

Oppmøte: Over vegen frå turinformasjonen, skilt med "Møteplass". Oppmøte kl. 09:45 – turen startar kl. 10:00.

I mellomtida oppmodar me alle til å lese seg opp på fjellsjekkereglane:

Fjellsjekkereglane

1. Legg gjerne ut på sjekking i fjellet utan trening. Øving gjer meister!
2. Meld frå kvar du går, slik at de kan møtast igjen.
3. Vis respekt for andre si luefarge. Grøn = ledig, raud = opptatt, oransje = kanskje open for kontakt.
4. Bli vêrfast – og få ein ekstra dag til å finne din utvalde.
5. Ta alltid med rikeleg med tursnacks som kan delast. Vegen til hjartet går ofte via magen.
6. Lytt til erfarne fjellsjekkarar.
7. Hugs kart og kompass – det gir òg ein god grunn til å spørje om hjelp.
8. Gå ikkje åleine – spør om de skal slå fylgje.
9. Vend i tide – det er ingen skam å springe etter for å be om telefonnummeret.
10. Spar ikkje på smila – og le gjerne av dårlege vitsar!

Turen er i regi av DNTung